كان يا ما كان بحياتي كنت انت، خاطرة تحكي قصة فتاة أحبت بكل ما فيها... ثم خسرت كل شيء دفعة واحدة.
كان يا ما كان... بحياتي كنت إنت
البداية كانت حلم بتعرف.... كل شي بلش بصدفة صغيرة؟ نظرة عابرة بشارع مزدحم، ضحكة خجولة ما قدرت تخبّي دفاها وإحساس غريب كان عم يكبر جواتي بدون ما حس يمكن، من أول لحظة شفتك فيها، حسيت إنه في شي غير، كبرت القصة بقلبي وأنا كنت غافلة، كنت شوفك الحلم يلي ما بيصحى، والملجأ الآمن يلي كنت احتمي فيه من كل شي بخوفني.
كبرت أحلامي حواليك، صرت خطط لأيامي على أساس وجودك، كنت حس الدني بتضيق لما تغيب عني، وكأني عم إختنق بدونك، ضحكتي كانت معك، دموعي كنت تمسحها بكلمة، صرت احكي معك بتفاصيل صغيرة ما كنت قادرة شاركها مع أي مخلوق، صرت احسك مو بس شخص بحبه… صرت دمي، روحي، أنفاسي، وكل شي بيخلي قلبي ينبض.
والغياب... كسر الحلم
اليوم أنا بلاك، اليوم أنا واقفة بنص الزحمة، وأنا أكتر وحدة حاسة بالوحدة، عم كلم حالي متل الغريبة، وكأن كل العالم تغير من بعدك.
برجع بمرق عالأماكن يلي كنا نمشي فيها، وبتذكر ضحكتك يلي كانت تعبي المكان، بسمع الأغاني يلي كانت تربطني فيك، كل لحن صار وجع، كل كلمة صارت ذكرى بتعور القلب.
بشم الهوا وبحس فيه ريحتك، كأني بعدني عم دور عليك بكل زاوية، حتى الكلمات يلي كنت قلك ياها صارت حبيسة جواتي، خايفة إني أفتح قلبي قدام حدا جديد، خايفة من الخيبة، من الكسر يلي ما بيتصلح تاني مرة.
بتعرف شو اللي موجع أكتر من البعد؟ مو إنه تكون بعيد، لا، الوجع الحقيقي، إنه كل تفصيل صغير بالحياة يتحول لطعنة، غنية وحدة بترجعني لأول موعد، شارع بمرق منه، بسمع صدى خطواتنا، كاسة قهوة بشربها، بحسها ناقصة... ناقصها أنت.
شو بدي خبرك عن ليل ما بينام؟ عن دمعة بتنزل بلا صوت؟ عن حضن كنت أدفي فيه قلبي... واليوم صرت بردانة حتى من جوا؟
معقول ننسى؟
معقول يمر الوقت، ونصير غريبين؟
نمشي بنفس الشارع، وما نعرف بعض؟
معقول ذكرياتنا تصير غبار، ينمسح بسهولة؟
إذا بيجي يوم ونسيتني، إذا قلبك قدر يتخطى اللي كان، بس تذكّر، إنه كان في بنت حبتك أكتر من حبها لحالها، كانت تشوف فيك حلمها الوحيد، وكانت تعتبرك وطنها الصغير بوسط عالم قاسي.
عشت النهاية يلي ما تمنّيتها، مو كل القصص بتنتهي متل الأفلام، مو كل الأحلام بتتحقق، في قصص الله بيكتب إلها نهاية قبل ما تكتمل، وإنت كنت قصتي الناقصة، كنت الحلم يلي صحيت منه مجبورة.
بس، رغم كل شي...
ولا يوم، ولا ثانية، رح أعتبرك شي عابر...
إنت كنت الحياة يلي تمنّيتها...
إنت كنت الحلم يلي ما كنت بدي فيه صحوة...
وكان يا ما كان... بحياتي كنت إِنت 🖤
تمت الكتابة بواسطة: حسيب أورفه لي.
هل كان المحتوى مفيداً؟ رأيك يهمنا وتعليقك يفيد الموقع